Moh Arif Widarto

Kanthi nyebut asmaning Gusti Allah kang Maha Murah tur Welas Asih, aku mantep mlebu dadi anggota Partai Gerindra lan dhaftar dadi bakal calon legislatif Partai Gerindra. Aku daftar dadi bakal calon legislatif kanggo DPR RI saka daerah pemilihan Banten III (Kabupaten lan Kota Tangerang).

Nanging, nganti saiki aku durung entuk kabar ngenani nomer urut lan daerah pemilihanku sing ditentokake karo Partai Gerindra. Muga-muga aku entuk nomor urut lan dapil supaya bisa berjuang ana ing palagan pemilihan umum tahun ngarep. Amin.

Jan nggegirisi tenan. Ana santhet liwat sms lan sms setan. Edan tenan. Jebul jaman saya maju, ngelmu iblis yo melu maju.

santhet liwat sms sing ngandhakake Ki Gendheng Pamungkas. Iki mbokmanawa isa dipercaya. Dene sms setan, kuwi mung kabar ora bener akal eleke wong kurang gaweyan.

Dhek tanggal 29 April 2008, ngepasi aku budhal saka kantor lan numpak pit montor Bajaj Pulsarku sing kelire abang, henponku muni. Ana sing nelpun aku. Kadi biasane, aku ora tahu ngrewes tilpun mlebu yen aku agi numpak pit montor. Ribet le arep ngangkat tilpun sebab aku nganggo helm cakil lan kaos tangan. Nanging, nganti setengah jam kok sing tilpun ora mandheg-mandheg. Tak rasakake sing tilpun kaya kudu bisa sesambungan sakcepete. Mula, aku ya njur mandheg lan niliki sapa sing tilpun terus. Jebule ana loro, kangmasku lan sedulur prunanku. Aku gage nilpun kangmasku lan takon ana apa.  Masku ngabari yen bapak tilar donya dipundhut Gusti Allah.

Aku gage tilpun kanca kantor lan ngabari lelayu sisan njaluk tulung sopir kantor kon ngeterke mobil neng omahku arep dakgawa mangkat Sleman. Alhamdulillah, saka kantor nawani supaya sopire sisan ngeterke aku tekan Sleman. Jujur wae, tensiku pas dina kuwi 160/90. Ora pati sehat kanggo nyopir saka Tangerang tekan Sleman.

Dina Rebo 30 April 2008 bedhug kaping 11 aku tekan ngomah. Bapak durung disarekake. Rencanane bapak arep disarekake bedhug kaping loro awan.

Sugeng tindak, Pak, keluarga sampun ngikhlasaken panjenengan.

Antarane tahun 1990 aku durung ngerti apa sing jenenge internet. Tahun semono aku mentas wae lulus saka SMP lan arep neruske menyang SMA. Aku ki mung wong ndeso sing ora ngerti apa-apa. Komputer mung isa gumun nek ana sing crita. Olehku gumunan kuwi diwiwiti pas jaman aku SD. Ana guruku asmane Pak Samijo kerep crita babagan putrane Pak Kus sing wis pinter dolanan komputer. Oalah, nek kelingan jaman semana, mbayangke komputer wujude kaya apa wae aku ora tekan.

Neng SMA ana pelajaran komputer nanging kakehan teori kurang praktek. Arepa sekolahanku kasebut sekolah apik, anane komputer diengo sak komputer kanggo telung murid. Nek pelajaran komputer, ana bocah telu njegugug neng ngarep komputer. Komputere mesthine yo gumun ndeloki ana bocah telu pating pendelik rebutan kibor. Eling, Mas, tahun semono komputer durung nganggo clurut eh, mouse.

Lulus SMA mlebu kluiah ing Padhepokan Dhuwur sing bayarane paling larang. Ana komputer neng perpustakaan nanging aku isane ya mung ngingetke kanca-kanca sing padha dolanan komputer. Ana barang wujude lonjong, kabele cilik dawa persis buntut tikus sing isa digunakake kanggo nyetir kursor. Aku gek ngerti nek barang kuwi pancen tikus alias mouse. Oalah… tahun 1994 kok rung ngerti nek wis ana sistem operasi komputer sing jenenge Windows. Jan… aku iki cubluk banget. Aku kelingan prastawa sing marahi isin dhewe nek dhong kelingan. Aku ditawani dolanan komputer karo cah wadon sing dakdelokake le dolanan minesweeper. Aku gedhag-gedheg karo mocap, "Ora, aku mung ndelok wae. Ora isa le main." Jan… tahun 1994 ora isa main minesweeper? Ngisin-isini tenan.

Tahun 1995 aku agi werus sing jenenge internet. Ana kancaku sing omahe ing Komplek BPK V Gandul sing meruhi aku karo barang sing jenenge internet. Komputer kudu disambungke karo kabel tilpun supaya isa nyambung neng internet. Ana alate sing jenenge modem sing dienggo nyambungke komputer karo kabel tilpun. Nyambung neng internet kudu liwat sing jenenge ISP, internet service provider. awake dhewe kudu daftar dhisik dadi anggota supayane bisa nyambung karo jaringane ISP. Duwe modem, komputer karo sambungan tilpun thok durung cukup. Kudu dadi anggota ISP supayane wektu arep nyambung neng internet awake dhewe isa ngisi jeneng karo ukara sandi. Wah, aku seneng banget digawekake email neng Rocketmail. Email sing saiki wis ora ana layanane. Kuwi tahun 1995.

Saiki, sapa ngira nek internet uga isa dadi sarana golek dhuwit? Wus akeh wong kang isa ngasilake dhuwit saka internet. Dudu dhuwit sithik nanging dhuwit sing cacahe akeh, nganti ewon dolar. Wah, jan aku ki ketinggalan jaman. Kawit tahun 2000 wis ngerti CommissionJunction, ClickBank, Amazon lan sapanunggalane ning kok ora ngerti carane nggunakake kanggo ngluru dhuwit.

Upama Sampeyan isih maido karo pawarta sing dak kandhakake, aku wani mbuktekake. Arepa isih sithik, aku uga wis kasil melu-melu golek dhuwit saka internet. Carane gampang-gampang angel. Ana sing gampang ana sing angel. Golek dhuwit sithik gampang, golek dhuwit nganti ewon dolar, angele sakpole.

Sugeng rawuh para tamu. Nyuwun ngapura dene aku ora nganggo boso kromo ing blog iki. Pancen, aku nyepakake blog iki kanggo nulis ing Boso Jowo. Blogku sing ditulis nganggo Boso Melayu wis pirang-pirang. Mulo kanggo melu ngramekake Blogdetik iki, aku nggawe blog anyar sing tak niyati kanthi banget arep taktulisi nganggo Boso Jowo.

Aku wedi nek mbesuk ing wayah mburi Boso Jowo diaku karo Malaysia sing gaweyane ngedom kreteg kae. Hayo, Sampeyan ngerti artine "ngedom kreteg" apa ora? Jang kebangeten tenan upama Sampeyan ora ngerti.

Aku durung isa medhar sabdha dawa-dawa. Iki wektuku cupet tur cendhak. Aku kudu ngudi menir ing tlatah sawang eh… ing dhuwur donya.

Monggo disakecakake dhisik. Muga-muga blog iki bisa diisi paling sithik seminggu pisan.